و علي رأي الحوافريت : هابي "فالنطاين" داي

لو دخلت القهوة و لقيتها مكسوة باللون الاحمر ..متتخضش..اوعي تفتكر ان النهاردة ماتش للنادي الاهلي و لا فريق الاهلي في زيارة مفاجأة للقهوة و لا حاجة,, لا يا معلم , اول ما تدخل القهوة ح يقابلك الحوافريت في ازهي الوانه.. و شكله اخر ابهة ..و في ايده ورده حمرا (لا مش الفيلم بتاع يسرا الوردا الحمرا).و يقولك هابي "فالنطاين" داي

القعدة في القهوة انقسمت ما بين الكوبلز و كل الاحبة اتنين اتنين ... الترابيزات اللي مليانة هدايا و دباديب و الورد و الايدين اللي ماسكة بعض و العيون المسبلة و الكلام بالهمس و اللمس و النظرات و و الاهات و الصمت الرهيييييييب و عمك الحوافريت – مندوب كيوبيد ع الارض حاليا- مشغل موسيقي هادية و معلق زينة و عامل جو شاعري جدا جدا

لكن بعيدا عن الشباب النضيف اللي ضارب جيل ..و البنات الشيك و الاحمر و الالوانات و الشموع ... فيه قسم التعساء في الارض: اللي خطيبها سابها..و اللي البوي فريند جابلها ارنوب بدل دبدوب..و اللي حبيبته خلعت و قعد يندب العمر اللي راح..و العياط و البكا و النهنهة و الشحتفة ... و عمك الحوافريت نازل توزيع كلينكس

اما بقي الجمهور فهم جماعة الزباين الدايمة للقهوة من اصحاب المعاشات و ابطال دوري الدومينو و الطاولة ..و كانوا و لا معلقين الكورة مايسبوش مشهد الا وليهم تعليق: الحق ! بص الواد ابو جيل اللي هناك ده! الواد غرقان في عرقه !!ما هو معاه بنت زي القمر.. يا واد اتلحلح قولها بحبك!! شجرة و اتنين لمون هنا يا حوافريت..و هاتك يا ضحك

وما بين الحين و الاخر يقطع الصمت "واااااااااااااو" .. "ثانك يووه ماي دارلنج" .. اشي بقي دباديب و بوكيهات ورد ..و قلوب..و كروت...لكن لا يسلم الامر من مصمصة شفاه البنات اللي قاعدين لوحدهم.. بيتحسروا علي اللي هما فيه

جتنا نيلة في حظنا الهباب .. كان تعليق فتاة في العشرينات من عمرها.. محملقة بنظرها تجاه الاحبة .. ونظرة الحسرة في عينيها

و علقت صديقتها متحسرة وهي تشاهد شاب يقبل يد خطيبته : ياختي .ده خطيبي و لا افتكرني بفجل حتي

صرخت فيهم صديقة اخري باكية : امال انا اعمل ايه. اهئ اهئ.. الخاين الغشاش رحت له الكلية مخصوص النهارة عشان اديله هديته و اقوله هابي فلانتين..لاقيته واقف مع زميلته و بديها ورده..اهئ اهئ

اووه.. سورري تو هيير بابي...كان رد الصديقتين و اقعدوا يهدوا فيها

دخلت فتاة ممشوقة القوام.. شعرها البني مسدل علي ظهرها..البدي الاحمر..بوكية الورد..و الاهم ابتسامة ساحرة
هااااي يا بنات ( اقتربت من ترابيزة البنات الباكيات المتحسرا ت) ..هابي فالنتاين... شوفتوا ميدو جابلي ايه؟؟ ( بتوريهم انسيال من الفضة كله قلوب)و

ميدو؟؟ امال فين حمادة؟؟

اووه..نوو...حمادة راح خلاص.. ميدو البوي فريند الجديد بتاعي!! حاجة قمر كدة و معاه عربيه وهمية..مش الواد حمادة المعفن ده اللي كان مقضيها تسبيل ! باقولكم ايه يا بنانيت.. يادوبك امشي بقي عشان خارجين سوا سينما و عازمني ع العشا ..بااي

خرجت سوزي..و البنات مذهولين..

دي جاية تغيظني بقي عااااااااااااااااا .و انفجروا في العياط

وعلي ترابيزة تانية مش بعيدة... شاب.. عشرين ..واحد وعشرين كدة... اشعث الشعر .. بشبشب بصباع .. تي شيرت اسود و صورة جيفارا..و سيجارة و من بين الدخان بيندب حظه لصاحبه : مش البت بتاعتي خلعت با برنس

اووباااا...ليه كدة يا معلم؟ ايه اللي حصل؟؟ اكيد رزعتها كلمتين من بتوعك ما انا عارفك

ابدا بتقول ان مش ح ينفع نكمل مع بعض و ان انا لازم اجي اتقدم رسمي بقي..ع الاقل البس دبل و نقرا الفاتحة..و انا لا اجرؤ اكلم ابويا في الموضوع ده و اطلب منه و لا مليم..و انا لا خلصت كلية و لسة الجيش..و الشغل... المهم بقي يا سيدي هانت عليها اربع سنين الحب و المسجات و الموبيلات و الرنات ... خلعت و هابي فالنتاين داي... نزل شيشة يا حوافريت

لكن الحقيقة الحوافريت هو كمان كان مشغول... البيه واقف في الخرابة اللي ورا القهوة.. عند الباب الخلفي.. ضارب الجيل – او فازلين الله اعلم - في شعره..و وشه زي ما يكون عرف موس الحلاقة لاول مرة..و مديها كولونيا خمس خمسات..و بيقول للحبيبته: هابي " فلانطاين" داي يا حياتشي

ويجعله عامر