يوم المعلم كلمة العالمي الحادي و العشرين

كتمنا ع الخبر..علقنا الزينة.. فرقة الصحبجية جاهزة.. الباند كله موجود.. بطابيط وصّت ع التورتة و الجاتوه و الساليزون و البيتي بان و نص كيلو بقسماط بسمسم من الفرن اللي ورا القهوة
عمك الحوافريت علق الزينة..و نزل حلبسة للزباين ..و السخن و الساقع جاهز عشان المناسبة السعيدة.. طفينا الانوار..سكوووووووووت..سمو.. علو.. ارتفاع ..الكل قاعد و لا في جلسة تحضير ارواح

وصل المعلم كلمة القهوة.. اتفاجئ.. خير اللهم اجعله خير لقي القهوة مضلمة..مفيش حد..الدنيا هس هس.. بيدخل برجله اليمين.و صقف : يا اهل لله ياللي هنا.. يا حوافريييييييييييت انت يااااااااض

SURPRISE!!!!!!!!!

و نور و زينة و حركات و صواريخ في السما و لا بتاعة كاس الامم الافريقية و ابتدت فرقة الصحبجية بعزف.. هابي بيرث داي تو يووووووه ( بتاعة وليد توفيق)...و يا عيني المعلم كلمة مش مصدق.. امال الليلة ليلته..عقبال عندكوا و عند الحبايب..النهاردة عيد ميلاد كبير المعلمين... عيد ميلاد المعلم كلمة الحادي و العشرين..و دي مناسبة مش بتتكرر كتير.. ( طبعا السادة المشاهدين ح يسئلوا و هو يبقي المعلم كلمة من غير شر كدة برج ايه يا اسمك ايه انتي يا ابيتاف؟؟؟..اقول لهم بثقة: اجدع ناس..برج العقرب.. يعني الدماغ العالية.. يعني الذكاء و الفهلوة.. يعني الثقة بالنفس.. يعني العصبية.. يعني السيطرة و التحكم.. يعني الهندسة..و كمان كلية الهندسة..و طلبة كلية الهندسة..و امتحان الخرسانة.. و دكاترة الخرسانة.. يعني حديد عز..و اسمنت الدخيلة و ارقص يا حوافريييييييييييت) بعد كدة ابتدت فقرات الحفل الساهر وكانت نمرةالساحر المعجزة سعيد اللوزعي...و استخدم الحوافريت في فقرة تقطيعه اربا اربا و خرج تاني صاخ سليم من غير سحر و لا شعوذة ..و تلا فقرة الساحر.. فرقة الرقص الشعبي... " فولكلور الحوافريتي"..و تقدم الفرقة الراقصة الحوافريت في دور البجعة في بحيرة البجع... (و جاء اختياره لهذا الدور العظيم نظرا لانه ماشاء الله طول النخلة).. و بعدين كان فيه فاصل اعلاني حيث نزل الساقع و الحلو و الحادق..و يا عيني لسة المعلم كلمة مافقش من الخضة..مش عشان المفاجأة اللي عملناها..لا عشان مزاكرش للامتحان تقريبا..المهم.. بعد الحلبسة و سندوتش الجبنة الرومي و حتيتين الجاتوه اللي وزعهم الحوافريت – و فيه زباين اخدت سندوتش بسطرمة لذا لزم التنويه- بعد الاكل بقي.. قعدنا نسمع اجدعها كلام من فرقة الصحبجية..و عشان خاطر عيون الغالي المعلم الباشمهندس الاسطي اونكل كلمة توقفوا و لفترة محدودة عن الاغاني الكئيبة..و سمعونا اجدع اغاني هادفة من نوعية " المعلمة اللي خلت حياته بمبي مقلمة"...و وفي نهاية حفل ليالي اضواء المدينة.. اهدي المذيع الحوافريتي ارق التهاني القلبة من تيتة بالاسكندرية و عمو بسوهاج..و الخالة و العمة بطنطا..و احمد و حسين بكوم امبو..و اسرة الحفل و البرنامج تحب تهدي اغنية العنب العنب لصاحب الحفل.. المعلم كلمة..و نتمني له سنة سعيدة و عقبال تسعةو تسعين سنة و نص.. عشان مية كتير.. ح تعمل بيهم ايه يعني

بعد الحفل..و انصراف الجميع..و الهدايا بقيت اكوام اكوام اكوام..( قول ماشاء الله ح تقر ع الراجل قبل حتي ما يشوف الهدايا بتاعته).. نزل الحوافريت بالبخور و بخر المعلم كلمة من العين و عمل عروسة و قال رقيتك من عين ابيتاف و عين الحوافريت و عين بطابيط و عين السدغ و عين الزباين و كل اللي شاف المعلم كلمة و مصلاش ع النبي - عليك افضل الصلاة و السلام عليك يا نبي...و حرق العروسة في فحم الشيشة التفاح اللي نزلت للمعلم كلمة اللي قعد بقي يفتح الهدايا.. اللي جابله مسطرة تي (صنع في الصين ).. و سبحة 99 حبة ( صنع في الصين مع ان اللي مديهالوا قاله انه جابها معاه من العمرة)... و كرافته ( حرير ميه في المية صنع في الصين)..كريم جيل ( صنع في الصين)..و الحوافريت جاب له فيلم لجاكي شان عشان المعلم كلمة يستمتع بالجو الصيني.. و سقط سهوا ذكرا ان معلمين القهوة اتعشوا عشوة محترمة ..اكل صيني

و في الختام..نحب نقول..كل سنة و انت طيب يا ليبتون يا طيب..يا معلم كلمة

و علي رأي الحوافريت : هابي "فالنطاين" داي

لو دخلت القهوة و لقيتها مكسوة باللون الاحمر ..متتخضش..اوعي تفتكر ان النهاردة ماتش للنادي الاهلي و لا فريق الاهلي في زيارة مفاجأة للقهوة و لا حاجة,, لا يا معلم , اول ما تدخل القهوة ح يقابلك الحوافريت في ازهي الوانه.. و شكله اخر ابهة ..و في ايده ورده حمرا (لا مش الفيلم بتاع يسرا الوردا الحمرا).و يقولك هابي "فالنطاين" داي

القعدة في القهوة انقسمت ما بين الكوبلز و كل الاحبة اتنين اتنين ... الترابيزات اللي مليانة هدايا و دباديب و الورد و الايدين اللي ماسكة بعض و العيون المسبلة و الكلام بالهمس و اللمس و النظرات و و الاهات و الصمت الرهيييييييب و عمك الحوافريت – مندوب كيوبيد ع الارض حاليا- مشغل موسيقي هادية و معلق زينة و عامل جو شاعري جدا جدا

لكن بعيدا عن الشباب النضيف اللي ضارب جيل ..و البنات الشيك و الاحمر و الالوانات و الشموع ... فيه قسم التعساء في الارض: اللي خطيبها سابها..و اللي البوي فريند جابلها ارنوب بدل دبدوب..و اللي حبيبته خلعت و قعد يندب العمر اللي راح..و العياط و البكا و النهنهة و الشحتفة ... و عمك الحوافريت نازل توزيع كلينكس

اما بقي الجمهور فهم جماعة الزباين الدايمة للقهوة من اصحاب المعاشات و ابطال دوري الدومينو و الطاولة ..و كانوا و لا معلقين الكورة مايسبوش مشهد الا وليهم تعليق: الحق ! بص الواد ابو جيل اللي هناك ده! الواد غرقان في عرقه !!ما هو معاه بنت زي القمر.. يا واد اتلحلح قولها بحبك!! شجرة و اتنين لمون هنا يا حوافريت..و هاتك يا ضحك

وما بين الحين و الاخر يقطع الصمت "واااااااااااااو" .. "ثانك يووه ماي دارلنج" .. اشي بقي دباديب و بوكيهات ورد ..و قلوب..و كروت...لكن لا يسلم الامر من مصمصة شفاه البنات اللي قاعدين لوحدهم.. بيتحسروا علي اللي هما فيه

جتنا نيلة في حظنا الهباب .. كان تعليق فتاة في العشرينات من عمرها.. محملقة بنظرها تجاه الاحبة .. ونظرة الحسرة في عينيها

و علقت صديقتها متحسرة وهي تشاهد شاب يقبل يد خطيبته : ياختي .ده خطيبي و لا افتكرني بفجل حتي

صرخت فيهم صديقة اخري باكية : امال انا اعمل ايه. اهئ اهئ.. الخاين الغشاش رحت له الكلية مخصوص النهارة عشان اديله هديته و اقوله هابي فلانتين..لاقيته واقف مع زميلته و بديها ورده..اهئ اهئ

اووه.. سورري تو هيير بابي...كان رد الصديقتين و اقعدوا يهدوا فيها

دخلت فتاة ممشوقة القوام.. شعرها البني مسدل علي ظهرها..البدي الاحمر..بوكية الورد..و الاهم ابتسامة ساحرة
هااااي يا بنات ( اقتربت من ترابيزة البنات الباكيات المتحسرا ت) ..هابي فالنتاين... شوفتوا ميدو جابلي ايه؟؟ ( بتوريهم انسيال من الفضة كله قلوب)و

ميدو؟؟ امال فين حمادة؟؟

اووه..نوو...حمادة راح خلاص.. ميدو البوي فريند الجديد بتاعي!! حاجة قمر كدة و معاه عربيه وهمية..مش الواد حمادة المعفن ده اللي كان مقضيها تسبيل ! باقولكم ايه يا بنانيت.. يادوبك امشي بقي عشان خارجين سوا سينما و عازمني ع العشا ..بااي

خرجت سوزي..و البنات مذهولين..

دي جاية تغيظني بقي عااااااااااااااااا .و انفجروا في العياط

وعلي ترابيزة تانية مش بعيدة... شاب.. عشرين ..واحد وعشرين كدة... اشعث الشعر .. بشبشب بصباع .. تي شيرت اسود و صورة جيفارا..و سيجارة و من بين الدخان بيندب حظه لصاحبه : مش البت بتاعتي خلعت با برنس

اووباااا...ليه كدة يا معلم؟ ايه اللي حصل؟؟ اكيد رزعتها كلمتين من بتوعك ما انا عارفك

ابدا بتقول ان مش ح ينفع نكمل مع بعض و ان انا لازم اجي اتقدم رسمي بقي..ع الاقل البس دبل و نقرا الفاتحة..و انا لا اجرؤ اكلم ابويا في الموضوع ده و اطلب منه و لا مليم..و انا لا خلصت كلية و لسة الجيش..و الشغل... المهم بقي يا سيدي هانت عليها اربع سنين الحب و المسجات و الموبيلات و الرنات ... خلعت و هابي فالنتاين داي... نزل شيشة يا حوافريت

لكن الحقيقة الحوافريت هو كمان كان مشغول... البيه واقف في الخرابة اللي ورا القهوة.. عند الباب الخلفي.. ضارب الجيل – او فازلين الله اعلم - في شعره..و وشه زي ما يكون عرف موس الحلاقة لاول مرة..و مديها كولونيا خمس خمسات..و بيقول للحبيبته: هابي " فلانطاين" داي يا حياتشي

ويجعله عامر

العيد فرحة.. يا سلاااااااام ؟؟

يعني بيقولك العيد التلات مع ان السعودية ح تفطر بكرة ... قالها الراجل الجالس في اخر القهوة..و هو بيشد نفس من الشيشة التفاح و يترصد كل من يدخل و يخرج من القهوة...و اكمل

علي كدة احنا صمنا غلط و لا ايه يا رجالة؟؟

بالعكس بقي.ده احنا اللي صح... و هما اللي اتفزلكوا و شافوا عطارد مش الهلال..اهو حتي بص الجرنال بيقولك كدة..بص معايا.. و مال عليه راجل في الثلاثينيات من عمره و بيده جريدة ما..متقمصا دور المحلل الاستراتيجي

يعني العالم دي كلها صامت غلط و لا ايه؟؟ ذنب مين ده بقي؟

فرد عليه الشاب الملتحي و هو يلقي بالزهر :يا سيدي ده اجتهاد مفتي..و مش عليك غير انك تتبع مفتي بلدك و معلكش اثم ان شاء الله...و حتي هو مجتهد يعني معليهوش ذنب

ماشي يا عم المفتي... اهو رمضان خلص و عدا و لا حسينا بيه..وكل سنة و انتم طيبين..كان رد صديقه العجوز وهو يراقب زهر الطاولة بينهما

همهمات التهنئة.. و عادالرجل ليقول : و انت بالصحة و السلامة... بس تصدق ان فعلا رمضان و العيد مالهومش طعم السنة دي..مش عارف ليه كدة!!.

ومع دخان الشيشة, قال العجوز : الناس قرفانة يا عمي.. حال البلد في النازل و الناس نسيت الفرح..و مبقاش حد عارف يفرح.. فين ايام ما كنا نشوف صواني الكحك نازلة الفرن.. و الستات نازلة تشتري المكسرات و الملبن و الدقيق و السمن بالكيلو و قاعدين ينقشوا و يعملوا... ايام بقي

شاب متزوج حديثا رد متهكما: يعملوا ايه يا جدو؟؟ كحك؟؟؟ ... و الله انت راجل طيب.. انا لسة مراتي قبل ما انزل بتقولي ايدك علي ميتين جنيه بالميت كدة..و قولتلها ليه يا ستي.. بتقولي ح انزل اجيب الكحك و البيتيفور.. ليه يعني.. يطلع بكام كيلو الكحك و كيلو البيتيفور يعني

انت مش عايش في الدنيا و لا ايه؟..ده كيلو البيتيفور وصل لاربعين جنيه دلوقتي و طالع..و طبعا شوف كام صنف ح تجيب.. بسكوت جوز هند و نشادر و كحك سادة للعيال..و كحك بملبن ..و بيتيفور اشكال و الوان.. كانت مداخلة جديدة من المحلل الاستراتيجي الرسمي للقهوة ..ونادي علي الحوافريت.. تعالي يا بني غير الحجر بلاش قلة مزاج

ضاحكا اضاف العجوز : اه بقي..و لازم من كل دول تجيب لحماتك و ليك و لوالدتك..احمد ربنا ان مراتك طلبت متين جنيه بس... و اعتلت الضحكات..و بدا القلق علي وجه الشاب مفكرا بالمصاريف القادمة

ترك الشاب الملتحي الطاولة فجأة و قام بتوزيع بعض المطبوعات علي زبائن القهوة..و سط استغراب البعض

ايه يا بني ده.... " ماذا بعد رمضان؟"..ايه ده؟؟

رد عليه الشاب: بعد ما خلص رمضان.. احنا كلنا في امتحان للايمان ان كنا ح نثبت علي الطاعة و لا دي كلها كانت مظاهر ايمانية للشهر الفضيل و السلام؟

تصدق عندك حق.. نص اللي كان مواظب علي صلاة الجماعة في المسجد في رمضان و لا حتلاقيهم من بعد صلاة العيد من بكرة.. كانوا واخدين العبادة منظرة.. الحاج رايح الجامع و جاي من الجامع..و في ايده سبحة.. بس روحانيات الشهر راحت.. و حترجع ريما لعادتها القديمة.. و الناس اللي قايمة نايمة و المصحف في ايدها ح يتركن علي تابلوه العربيه تاني

بدا الاسف علي الوجوه من النفاق السائد ..و استمر الشاب بتوزيع مطبوعاته الدينية.. و دخل احد الاصدقاء الدائميين للقهوة منهكا و القي السلام

و عليكم السلااااام و رحمة الله ... ايه يا معلم فينك..مستنينك من الصبح؟

اصل انا و الجماعة لسة كنا بنجيب لبس العيال..و الشوارع زحمة و الجو حار .. قالها و هو يمسح عرقه و يرتشف بعض الماء البارد

واخبار السوق ايه و المحلات؟؟


الدنيا مولعة..و محدش بيشتري..و مافيش فرحة العيد خالص علي وشوش الناس.. ما الدنيا طول عمرها غالية..و كنا بندفع برده مضطرين..و نشتري.. بس كنا فرحانين.. معرفش مالنا ..محدش حاسس بفرحة ليه

فرحة ايه يا معلم و البلد منهوبة...و وارثنها و التعليم في الضياع..و ابنك مش عارف تجوزه..و بنتك عايز تسترها و خايف عليها من الزمن ده.....و اخلاق راحت من زمان... السعادة خرجت و لم تعد... تيجوش نعملها اعلان في باب المفقودين في الجرايد.. ابحث مع الشرطة و مكافأة مجزية لمن يجد السعادة؟!؛

هنا ضجت القهوة بالضحكات...و عادت اصوات الزهر و الطاولة و ايوووووووووة جاي

وانساب صوت ام كلثوم من الراديو و هي تشدو يا ليلة العيد

كل سنة و انتم طيبين

ما وراء رمضان

فطرنا و حلينا و ظبطنا الظبابييط و كحرتنا الأناني .... و تقلنا سيكا علي الحلو عشان نحبس الفطار و نزلت أتفقد أحوال الرعيه .. أقصد أحوال القهوه و الأيراد و الحوارات ... أصل بيقولك المعلمه أبيتاف شغاله أعلانات اليومين دول للقهوه الله ينور ... و برضه يعني الأمر ميسلمش من التربات و الحوارات و الخناقات .... الواحد برضه ياخد بالوا من قهوته و خصوصا أن حوافريت - صبي القهوه - مبيفوقش من الكوله .... ربنا يتوب عليه بقي

حجر غيار يا زفت يا حوافرييييييييييت

أنهارده أول أيام رمضان كل سنه و أنتوا طيبين ... عندنا جوه فرقه الصحبجيه كامله بيحيوا الليله و بينضفوا ودان زباين القهوه

شديتلي كرسي في الموكنه بتاعتي ... و أعدت أسمع الأغاني اللي صوتها يادوب واصل ... أحساس ظريف لما المزيكا تكون هاديه و بعيد ... بتحسسك بالراحه .... و النوم أحيانا

و كالعاده مارست هوايتي القديمه في الأستماع الي الزباين و حواراتهم الفكسانه و شكوتهم المستمره من القهوه

كان قاعد جنبي شويه شباب كلهم - بلا أستثناء - مولعين سجاير أو بيشدوا في معسل واحد منهم بنضاره و مسرح شعره و شكله ابن الناس الكويسين .... و اخر شاب شعره منعكش و شكله معفن و اخر شكله ملخبط يحسسك انه تايه .... و اخر شكله أكبر منهم شويه و تقدر تقول أنه متخرج من فتره ظريفه لأنه أكتر واحد فيهم بييجي علي القهوه

المهم يعني اللي شدني للحوار أن الواد اللي كله تايه قال انه عايز يبطل تدخين

مش هنبطل سجاير بقي يا جدعان

و كانت ردود الأفعال غريبه .... اللي برقله و اللي شتمه و اللي تف في وشه و اللي قاله عمرك ما هتبطل و كسر مقاديفه في لحظه

الواد أتسمر : ايه ي جدعان الحياه مش كده ... أنا بقول رمضان بقي و الجو ده ... فرصه يعني نبطل شويه

الواد اللي كله معفن : يابني أنا رمضان اللي فات أتفقت مع الشباب نبطل جماعه ذي ما سعادتك بتقول .... المهم بقي أن كلنا بطلنا لمده 3 أيام و بقينا نشرب من ورا بعض لحد ما أتفقسنا

الواد المتخرج : أنا ببطل سجاير في رمضان الصبح عشان غصب عني , أقول هبطل بليل برضه .. بس بمجرد سماع الأذان و شرب اي حاجه بطلع علي البلكونه و أولع سيجاره في السريع كده ... و للصدف بقي بلاقي شباب الشارع كلهم في البلكونات برضه متكمرين و مولعين و علب سجاير بتتحدف من بلكونه للتانيه و ولاليع و علب كبريت ..... يعني مش أنا بس اللي كده ... دا غير أني بدخن بقالي حداشر سنه .... كلمني بقي شويه أني أبطل

الواد أبن لناس الكويسين : بص يا معلم أنت جتلك فرصه عشان تبطل سجاير ... لو عايز تبطل بطل بس موعدكش أن حد فينا يساعدك ... ,لو مش عايز يبقي أقفل السيره دي

الواد اللي شكله معفن : من الأخر ياد هي مسأله صحبه و طريقه حياه .... لما تقدر متعرفناش و تبطل تيجي القهوه و تغير حياتك .... أبقي ساعتها قولا اللي أنت عاوزه ... تقلبليش دماغي بقي مش ناقصك .... جتك الأرف كرهتني في أم السيجاره

قال اخر جمله دي بحرقه قوي أكنه مستني اللي يقوله أرميها ... و فورا أخد أخر نفس و رماها و داس عليه بغل و طلب شيشه معسل فورا

ليالي رمضان

دخل المعلم كلمة القهوة و رمي السلام و شد له كرسي..و نادي ع الحوافريت و طلب الشيشة التفاح بتاعته..و انا نفسي طلبت حاجة سخنة عشان الانفلونزا اللي عندي...و ايوووووووووووووة جااااااي..ده كان الحوافريت طبعا

ندخل في الموضع بقي يا عم كلمة...احنا ايه بقي نظامنا في رمضان بالصلاة ع النبي؟
الف صلي عليك يا نبي...شد نفس من الشيشة....و رد: طب قولي كل سنة و انت طيب الاول
يا سيدي كل سنة و انت طيب و بعودة الايام....هه يللا ايه" بروجرامنا" في رمضان؟
بهدوء يحسد عليه ..و شد نفس تاني من الشيشة و انا متغاظة : و انتي طيبة... نظام ايه ان شاء الله؟
مش فاهماك..هي القهوة مش لازم يبقالها استعدادات عشان استقبال رمضان؟

قام واقف المعلم كلمة في نص القهوة:و قالي: تعالي هنا معايا بصي..و كأجدعها مهندس ديكور .. ابتدي يشاور..الحيطة دي...ح نحط بوستر كبير..و ع الباب في الركنة دي...ايوة هنا... ح نجيب فانوس من الملونين دول هه واخدة بالك معايا..و نحطه هنا...وورا هناك كدة..و سع كدة شوية يا حوافريت.. ايوة الله ينور عليك....ح نعمل قعدة عربي..و شيشة عجمي,,,و كله في الالسطة...و بطابيط هانم.. بتحضر المينيو للسحور ان شاء الله..و كل عام و انتم بخير

باستنكار اقوله... بس؟؟؟؟؟
امال انتي عايزة ايه..لا ماهو اقولك ..خدي بالك من الميزانية..و بدء هنا يهمس..ان الميزانية و راس المال و مرتب الحوافريت اللي بالشئ الفلاني
يا عمنا مش لازم...انا باتكلم يعني نعمل جو اورينتال...حاجة قعدة مصرية..جو من ايام زمان كدة..يعني فكرة اللمة و السهرة...يعني...الروح مش بس الديكور...ايه رايك؟

لسة المعلم كلمة جي يفتح بقه.... فوقنا علي خبطة علبة طاولة... :و انتوا يا بتوع اليومين دول تعرفوا ايه عن ايام زمان..و ليالي زمان

التفت لاري رجل في العقد الخامس من عمره..اشيب الشعر..و لقيت ان تقريبا الزباين كلها مركزة معانا في حديثنا

كمل الراجل كلامه..: يا عيني علي رمضان زمان, ايام ما كنا بعد العشا و التراويح . كنا ننزل ع الساعة واحدة و

انقضيها طاولة و شيشةع القهوة.. و الضحك و يا الصحبة للصبح

و تدخل رجل اخر : اه و الله كنا نروح تاني يوم اشغالنا فايقين و رايقين و لا تعبانين و لا حاجة ..و ندي مواعيدنا كلها ع القهوة.. و نتجمع حولين الراديو نتمزج بام كلثوم..ااااه يا عيني

و وسط استمتاع بحديث الذكريات.. اقتحم الصمت المرادي شاب في العشرينات من عمره, بلحية: فرفشة ايه و ضحك ايه.. استغفر الله العظيم... رمضانه ليله و نهاره للعبادة.. اختم القران..و اعبد الله عزوجل لعله يغفر لك..و قضي نهارك في قراءة القران و قوم الليل و صلي التراويح و الشفع و الوتر.. استغفر الله مش اغاني و كلام فاضي

ارتفعت الهمهمات و التعليقات المستنكرة علي غضب الشاب... و التفتناعلي صوت هادئ لاحدهم: يا بني... رمضان شهر عبادة و صوم... بس روح المصريين في انهم يتجمعوا في مناسبة حلوة...من غير ما يغضبوا ربنا... لما يتلموا في قعدة حلوة.. و تلاقي عمك الحاج اللي هناك ده قاعد مع شاب عنده تسعتاشر سنة..و انت يا بني بتهني عمك العجوز اللي هو انا..و نرجع من التراويح سوا ع القهوة...و نلعب دورين طاولة...بذمتك مش احسن من برامج و مسلسلات رمضان الهايفة...و ملو البطون من الاكل؟؟

هنا طبعا.. الشاب الملتحي.. اقعد ..و بدا يهدا و يسمع للكلام

لقي كلام الرجل استحسان منا جميعا.... و كمل كلامه.. يا ولاد ده احسن شهر.. في لمته و عبادته..و استقباله.. و سهراته ... ايام ما كنا نتجمع حولين حد بيعزف عود... و لا فرقة انشاد ديني... و لا الطرب الاصيل.. رمضان ماهواش يسرا و الهام شاهين و لا انك ح تفطر و تتسحر و متعرفش مين اللي قاعد جنبك..

اقترب من المعلم كلمة, و حط ايده علي كتفه: و قاله: نصيحة يا بني: انت الديكورات و الوان و البتاع افكار حلوة... حاول تعمل حاجات جديدة.. اربط الناس ببعضيها.. خلي ده يطوع يعزفلنا عود.. دي ليلة ع الكاسيت نسمع الست...و لا حد منكم يا شباب.. يطوع و يعملنا امسية شعرية.. كدة.. و انا اول واحد متطوع معاكم..و ح اجيب ابني يدندن ويانا ع العود.. ايه رايكم؟

بصيت للمعلم كلمة اللي ابتدي يدور الكلام في دماغه و نادي ع الحوافريت يجيبله الشيشة و قعد مع مجموعة كبيرة من زباين القهوة: الشاب الملتحي و اصدقائه و الراجل العجوز و مجموعة اخري التفتوا حوليه.. و ابتدوا يفكروا في برنامج القهوة في رمضان ... ودعتهم... قابلت المعلم السدغ ف الطريق شايل الجيتار بتاعه.. شاورتله علي ترابيزة المعلم كلمة اللي كلها ضحك و هزار.....و رمضان كريم

مارينا رايح جاي

أنقطعنا علي القهوه كلنا لفتره ظريفه .... المعلم سدغ كان عنده حفله - عقبال عندكوا- و مش فاضي ... حكم الحفله دي في حوش أبو سحر و الناس اللي هتييجي هيكونوا ناس لارج أوي ... أما المعلمه بطابيط الحمد لله يعني ربنا فك سجنها و رجعت من معتقل الساحل .... مع الشباب الجامد التنين ... محمد عطيه و هاني و أصحابهم اللامأخذه ال..... ما علينا يعني .... أما المعلمه أبيتاف فتأريبا كانت بتفكر في حاجه شغلاهه و الحمد لله برضه طوت صفحه الأحزان أخيرا .... أما أنا فكنت بفكر في عمل دراسه عن الأنتحار ... بعيوبه و مزاياه ... لكن الصراحه أنتهي الموضوع معايا بصداع و نوم .... صحيت أمت جيت القهوه

المهم يعني .... رجعت لقيت القهوه ذي ما هيا .... بناسها و كراسيها و شيشها و كل حاجه متغيرتش ... بصيت حوليا ملقيتش حد أعرفه .... رحت واخد موكنه حلوه كده ...كنت أتعودت أقعد فيها و أتكمرت مع نفسي و فضلت أتفرج عل تليفزيون لحد ما أي واحد من البهوات يشرف

حوافرييييييت .... شيشه معسل و قهوه سريقوسي و شغل معاك التليفزيون

بسرعهههههههههههههههههههه ياااااااااااددد

الواد قام هز طوله و فتح التليفزيون و راح جايب أغاني ... كانت قناه ميلودي .... ظريف أنا بقالي كتير مش بتفرج عليها و مش بسمع الأف أم ... يعني أهو أعرف برضه الغنا وصل لايه

الأغنيه خلصت و جه بعديها كام أعلان ... و بدا برنامج أول مره أشوفه أسمه مارينا رايح جاي

الشيشه مجاااااااااااااااتش ياااااااااد

قلت أشوف بقي يا معلم مارينا وصلت لأيه دلوقتي ... منا أصلي مروحتش السنادي ... المهم الشيشه نزلت و القهوه نزلت في غمضه عين .... و لقيت الواد حوافريت واقف متسمر أدام التليفزيون ... و الصراحه يعني ... حقه

البرنامج صعب يتقال عليه ظريف .... بس مسلي .... و دي حاجه تحسبله... و هو قايم أساسا علي حريم مارينا و جمدان حريم مارينا ... و خفه دم حريم مارينا ....و شباب مارينا برضه ليهم دور في الشو ... بس مش ذي دور البيكيني عل كاش و التان و الجو ده طبعا

سرحت شويه مع الناس اللي قاعده حوليا ... ملقيتش حد بيعمل حاجه غير أنه متنح في التليفزيون ... اللي بيلعب طاوله ساب الزهر و اللي نسي الشاي لحد ما برد و اللي نسي أنه علي قهوه و بدأ يمصمص شفايفه و يركز أكتر عل حريم واللي قاعد مع خطيبته و بدأ يعقد المقارنه .... كل اللي كانوا قاعدين متجمعين علي كلمه واحد ... مارينا رايح جاي .... شباب و شيوخ و أطفال

المهم يعني لقيت البنت المذيعه و تقريبا أسمها مي ... ماشيه بتتدنجل في شوارع مارينا خمسه و راحت علي أتنين شباب قاعدين عل رصيف ,,, و الظاهر أن الشباب دي كانت مصطبحه .... يعني كانوا مسموكين ... و بالعربي يعني ضاربين ... و غالبا هوا الحشيش ... دا بما أنهم في الساحل يعني .... المهم البنت بكل برائه ضحكتلهم و جت تقعد جنبهم

هاي ... ممكن أجي جمبكم شويه

الواد بص ناحيه الصوت لأنه أكيد مش شايف حااااااجه .... الواد كان معمي ... فتح عينه بقطر عشان يشوف .... فأبتسم لها بغباوه و عنيه لسا مأفله و بعدم فهم لأي شيء قالها

أتفضلي طبعا

المهم يعني بتسأله سؤال .... يا تري ترضي ترتبط ببنت كانت مصاحبه قبل كده

الواد فتح عينه -بالعافيه- و بصلها و قالها .... مييييييين

البنت ضحكت و قعدت تهرج عشان تداري الفضيحه اللي أتورطت فيها مع جوز المساطيل ... راحت رايحه علي الواد التاني ... و قالتله نفس السؤال ... في محاوله فاشله لأنقاذ ما يمكن أنقاذه

الواد بدوره قعد يهاوهاو ...

لأ طبعا .. مش ممكن ... أصلها يعني حضرتك ... لو يعني مثلا كانت مصاحبه قبلي ... فأكيد يعني أنا معرفش هيا صحبت ميين بقي .... و بعدين ممكن تكون طبعا صاحبت اتنين ولا تلاته ولا تسعه ... أنا هعرف منين .... و بعدين معرفش ممكن يكون أتعمل فيها أيه يعني

البنت وشها بقي أحمر من عينيهم هما الجوز وأطعت الحوار و رجعت للشاب الأولاني اللي كان مشغول بالهرش و ضرب البراغيت الوهميه اللي علي دراعه

و خلص البرنامج بعد شويه يعني حلوين جامدين و حرانين .... قوي

مارينا متغيرتش يا رجاله ... ذي ما شفتها لأول مره من سبع أو تمن سنين متغيرتش يعني

حوافريت أتفك من التسميره اللي كان فيها كل مده البرنامج و كذلك أهل القهوه كلهم رجعوا لأحوالهم ... اللي شرب الشاي و اللي رمي الزهر و اللي بيتأسف لخطيبته أنه مكنش معاها و أنا طلبت حجر ....

شباب الأيام دي

قاعد علي القهوه -كالعاده سلامترو- أخدت موكنه ظريفه و أتكمرت عن خلق الله ...مش طالبه معايا فرهضه و دوشه و عيال خالص .... القهوه يا معلم بتبقي وحشه قوي ساعه الضهريه .... أشي مخطوبين و خناقات و عيال بتضحك و صوتها عالي و اللي لامم حوليه أورطه بنات و بيحكي مغامراته في مارينا مع صاحبته اللي فرقعها عشان صوتها مسرسع ذي صوت زيتونه بتاعت باباي..... و أنا الصراحه بقي مليش خلق أسمع في حوار هبطان من شاب هيء لامأخذه يعني

بعد ما أتحرق صبري يا معلم مع خمس أحجره معسل و فنجانيين قهوه ... وصل -أخيرا-بني آدم أعرفه سيبك أن أبيتاف كانت قاعده بتكتب في حاجه و بتتفرج علي أتنين بيتخانقوا .... قلت يا واد سيبها في حالها لما تخلص اللي بتعمله يعني

المهم بقي .... كان مين الشاب اللي وصل ده بقي .... دا يا معلم يبقي الواد سليمان صاحب محل الفراخ اللي جنب القهوه .... و طبعا ولاد الحلال جابوله ضراف المحل في هوجه أنفلونزا الطيور و من ساعتها و هوا ملأح جمبنا عل قهوه

سلامات و بوس و أحضان و عشرتين (واحد و تلاتين) و حجرين و فيروز كمتري و ساعتين راحوا في الكلام الفارغ .... حكالي عمل أيه من ساعه ما بقي علي الحديده و دبح أي حاجه ليه أجنحه في المحل

بص يابو الشئايء.... أنا من ساعتها و الدنيا متنيله معايا مشروع الفراخ ده كان مشروع العمر لولا الأنفلونزا الزفت دي اللي نيلت الدنيا .....

يا عمي خيرها في غيرها .... أديك بتتعلم من اللي بيحصل يا معلم .... يعني هوا ده أول مشروع يفشل في الدنيا

الفكره مش كده يا بوب .... أنا الحمد لله يعني عملت قبل ده أربع مشاريع يعني ... و الحمد لله كلهم فشلوا برده ..... لا فراخ نافعه ولا محل أدوات رياضيه ولا الكتاكيت و محل البلاي ستيشن ذي ما أنت عارف كان علي قد حاله و اللي جاي كان علي قد اللي رايح و الأنترنت كافيه قالوا العيال الصغيره بتتفرج علي مش عارف ايه جوه و قفلوها بس الحوار كان عشان كان ساكن في العماره واحد ظابط -اللهي لا يوعي يكسب- بس مسنود يعني و متضايق من الزحمه و الدوشه هوا حقه بس يعني أنا زنبي أيه ... أروح أفتح في التجمع مثلا في الصحرا مع العمالو الفواعليه ... اللي عايز فيهم يشوف الأيمايل بتاعه و أي سي كيو نمبر... و الله دي حاجه تغم... اللي كانت ماشيه شويه هيا عريبه الكبده و الكلام ده ... صحيح المكان مكنش مورزق قوي و مكنتش جايبه همها يعني .. خد بالك برضه اني مش فاتح جنب عبده تلوث ....و بعدين بقي أستحمل رخامه الزباين
اللي عايز أسكندراني و أتنين بلدي بعدين يلغي الأسكنراني و يطلب تركي و يفتكر أنه نفسه في الكبده و يخنسر في الحساب ............ ييييييييييييييه كانت شغلانه

يا معلم أهم حاجه برضه الصياعه مع الناس دول ... مسمعتش الله يرحمه علي صالحين و هوا بيقولك (أهم من الفن الأتقان في الفن ).... ما علينا يعني ... و ناوي علي أيه دلوقتي

بفكر بقي في الخرفان .... دي الحاجه الوحيده اللي ذي الفل ... لا بتجنن و لا عندها زفت أنفلونزه و الموسم بتاعها العيد ... دا غير بقي اللي جايب عربيه جديده و اللي راجع من عمره ولا حج و أي كلام بقي و تفسه في دبيحه... أدعيلي بس تمشي المرادي ... و مطلعليش خزوق أسمه هبل الخرفان

والله ده اللي ناقص .... و الله يابني أنا بحسدك علي الأصرار ده ... ربنا يوفقك يابو سليمان

أي خدمه يا معلم أنا ورايه مشوار كده لحد الدكتور بتاع الخرفان عشان أظبط معاه

فل يا ريس ....

و أتجه في سكته و سابني متلأح لوحدي تاني ... ببص حولا ملقتش أبيتاف ... الظاهر أنها روحت
طيب وأنا هروح ليه أكييد هلاقي حد جي بيتدنجل دلوقي ... أو كمان ساعه ... أو أتنين ..المهم أن القهاوي مبتفضاش

أبعت حجر يا حوفرييييييييييييييييييييييييت

كريشندو

كل يا سيدي ما اسأل حد..عايزة حتة هادية و كويسة اقعد فيها عشان اكتب..واشرب حلبسة و عناب..يقولي سلامترو كافية
اقولهم..فين؟؟؟ يردوا : سلامترو كافيه..ايه مش عارفاه؟

سألت سوسو صاحبة ميمي..اللي مصحبة تيتي....انتوا بتروحو فين انتي و الشلة في الويك اند ..قالتلي يعني لو ح نقعد مع بعض كدة قعدة حلوة و نشرب حاجة...بنروح سلامترو كافيه

رحت لعباس اخو سامح..جار علاء..خطيب ولاء...قلتلوا انت كنت فين يا عم الجمعة اللي فاتت؟...رد بكل ثقة : ابدا بشيش في سلامترو كافيه

المهم..بطابيط اتصلت..بتديني ميعاد اقابلها في سلامترو كافيه..........وهناك يا سيدي عزمتني ع الحلبسة و عم كلمة قام بالواجب و اكتر..و استقبلونا استقبال حار

مرة بعديها..مكدبتش خبر....اخدت ورقي و اقلامي الرصاص و القلم الحبر الاسود ...و تقمصت دور ج ك رولينج (بتاعة هاري بوتر) واخدت ترابيزة في الكورنر..طلبت حلبسة من الحوافريت ..واد طويل و اسمر و شكله حوافريت فعلا.......طبعا "ميلودي" شغالة علي ودنه و العيال متنحة..و الحوافريت متنح و لاطع الزباين و مش بينزل الطلبات...و المعلم كلمة عمال يزعقلوا

مش مشكلة...جو الكافيه عجبني...حتي بدوشتها و اغانيها العجيبة ..وواحد بيغني..عمال يقول "بمبي مقلمة" و "يا معلمة"...معلهش برده ..نستحمل..قفلت الموبايل...القلم الرصاص مبري..الاستيكة بورقتها..و حط الحوافريت العنّاب اللي طلبته..و خلع..و ايووووووووة جاااااااااااااااي..وانا تمام كدة..يلا اكتب بقي


المشهد الاول
دخل طارق مع دعاء المقهي..و الايادي متشابكة...و الفرحة ترتسم علي وجههما...يغازلها..يداعب خصلاتها....وهي ساكنة...مبتسمة..و

طااااخ

انت مابتفهمش ولا عايز تسمع...و مش ح ينفع نكمل بالطريقة دي

يادي النيلة...سيبت الورق و قلعت النظارة..ايه في ايه؟..اتاري كان فيه واحد مع خطيبته...(اه خطيبته ..فيه دبل اهو)..و رمت كوباية البرتقال في خلقته...واضح انها مشاكل عائلية..مالناش دعوي.. هنا كل واحد في حاله

عدت الي اوراقي
الي الحبيبان..طارق و دعاء: اكتب
..الفرحة ترتسم علي وجههما...يغازلها..يداعب خصلاتها..وهي ساكنة..مبتسمة..(وبعدين.....؟؟ ايوة اهي..)..شفتاهما تكاد تنطق بالحب...عيونهما تتلألأ ببريقه...بريق الحب....احتضن كفها الصغير..وطبع علي جبينها قبلة...وهي..

طاااخ
وانتي مش مقدرة...انا طافح الدم ليل نهار..عشان الزفت الشبكة و الشقة و الشغل...و ابوكي اللي مش راحمني..عارفة يا هانم شقة في "مدينتي" دي تعملها كام؟ّّّّ!!!!!... ولا حتي ايجار جديد نافع ولا نيلة....وتيجي تقوليلي قولي كلام حلو؟؟؟؟؟

كانوا بيتخانقوا تاني بس المرة دي..رمي الحلبسة اللي قصاده..في وش حوافريت.......و صرخ..امشي هاتلي واحدة تانية....وهو بيبص لخطيبته بتحدي

كملت كتابة...وبدأ تداخل الاصوات اللي علي الورق و صراخ الخطيبان.....مع دخان الشيشة التفاح ..و اغنية "المعلمة "اللي خلت حياته" بمبي مقلمة" .....في كريشندو ..مع تيمبو طالع نازل....ولا بافاروتي في عصره و اوانه

..وهي خجولة بطبعها...احمر وجهها ..فما زادها الا تألقا ...همست بأذنه...سأسير معك الي اخر الطريق...سأظل بجوارك....سأكون حلمك

روح شوفلك واحدة تانية تستحمل القرف اللي انا شايفاه معاك

سأتحمل الصعاب و المشقات و اتكبد التضحيات من اجلك يا محبوبتي

وهو انا يعني مش شايف الويل؟؟!!!...ومش قادر اطلب من ابويا فلوس...ومافيش شغل في البلد دي..وانتي و طلباتك: يا احمد عايزة زفت..يا احمد لازم كذا..يا احمد بابا مش عارف ايه..لا وكمان..خرجني و فسحني....مش قادر علي كدة..الرحمة حلوة

سنظل معا للابد...لن تفارقنا البسمة..و سنعبر سويا جسور الشوك..و سنجعل قلبينا مسكن العشق

وهو انا كنت شفت منك ابيض ولا اسود و ربطني جنبك اربع سنين و لا شقة عرفت تجيبها.. و يا دوبك اتنيلنا اتخطبنا بالعافية..ومن يوم ما اتخرجت و انت لا بترسي علي شغل و لا عارف تلم قرشين ..و حتة الدبلة اللي ربطني بيها ......اهيه...غور بيها

والقت دعاء برأسها علي صدر طارق بحثا عن الدفء و الامان

و القي احمد الدبلة ف ولعة الفحم

والقيت انا بأوراقي

يا حوافريييييت.............الشيشة يا له

كله بيروح يا معلم

في أحدي ليالي الشتاء الكئيبه جلست مع ذلك الشاب الصديق ... في قهوتنا سلامترو .... جمبنا فنجانين قهوه سريقوسي و شيشتين معسل ... و بنتسلي بلعب (محبوسه) في ساعه متأخره من الليل
و بعد حوالي ساعتين ... زهقت و قلبت الطاوله و بعد سلسله من الحوارات و الخناقات الهايفه حول الزهر هل كان شيش جهار ولا شيش بيش ... و ذلك نظرا للأضائه الخافته ليلا داخل القهوه و خارجها اللي مش مخلي حد فينا شايف أيده ... مش الزهر كمان

المهم قلبنا الكراسي الي جانب بعض بعد أن كنا في مواجه بعض و ذلك لظروف الطاوله....و طلبنا حجرين و بدا يتكلم في حوار منغير أي مقدمات ... (تعرف أني متعكنن أوي)
رديت عليه و أنا يعني اللي بروح الملاهي كل يوم ... منا متنيل زيك و يمكن أكتر
بص علي نقطه وهميه جنبي و ركز فيها و بدأ يتكلم: سيبك من صاحبتي اللي كان المفروض أن الكلام معاها علي قرايه فاتحه الصيف ده و محصلش ... و سيبك أنها عماله تكلمني بقالها يومين و أنا اللي مششششش قاااااااااادر أكلمها .... أصلي هكلمها أقولها أيه ... أنا نجحت بس مش لاقي شغل .... هقول لأبوها ايه ....و سيبك أنه من يومين أتخانقت معاها و في وسط الخناقه قولتلها أني سقطت... عمرك شفت كده .... أنا ناجح و أول مره أنجح منغير ما أشششيل ولا ماده ... متخيل فرحتي كانت أزاي .... سيبك من دا كله ... سيبك كمان من حوار أمي اللي داخله المستشفي كمان يومين ... و امي دي مش بتاعت تهريج ... يعني اليوم اللي تروح فيه للدكتور دا معناه أنها بتموت ... لا قدر الله يعني
سيبك برضه من الألم اللي كلته علي كرامتي من .... صاحبنا اللي كان معايا في الشغل اللي فات
و سيبك أنه من ساعتها لا أخدت فلوسي و لا عارف ألاقي شغل تاني
و سيبك ..أنه
ٌقاطعته بشده ... أيييييه يابني ... أنت شايل ده كله و ساكت .... والله حرام عليك نفسك
بصلي و دموعه بدأت تنزل و أتكلم بصوت مبحوح ينزر بعاصفه البكاء اللي جايه : أنت عارف ايه بقي اللي مزعلني بجد .... أنا مش قادر أهرب

تنويه

Epitaph اسرة السلامترو ترحب بالمعلمة الجديدة
(الشهيره مؤخراً بالحوافريت (يعنى ايه؟!!! ايه الصنف الهباب ده؟
وهى جت هنا اساساً عشان اللى مايدفعش حسابه نكتب اسمه عاليافطة... و مش مضطرة اهدد اكتر من كدة... فأدفعوا اكرملكوا
آه ه ه ه ه ه نرجع لموضوعنا... بنرحب بالمعلمة ونتمنى لها اقامه سعيدة
و بمناسبة هذا الحدث حنوزع الحلبسة اللي هي وعدت بيها لكل المعازيم ..و كمان
عصير المانجة عشان اللي مش بيحب الحلبسة
;o) ده بالاضافة الي سندويتشات الهامبورجر و بنطلون استريتش


سيرى يا نورماندى... اصدى يا ابيتاف
منورة يا حياتشى السلامترو... و كل الناس مزأططة

هفلطه

يحكى ان كان فى عاهرة و كان فيه برضة سيسى
و كانت العاهرة عبدة للسيسى ده, مش عشان ماله أو جماله...لأ عشان من ساعة متولدت و هىّ كده
...و فضلت العاهرة كده
"السيسى يضربها, و هى تقول له "أمرك
"يشتمها, تقول له "باشا
...يجلدها, تطاطى
"يغمى عينيها و يحبسها, تقول "و ماله أهو برضه ساترنى
أصحابها قعدوا ينصحوها تثور و هى تقول "أخرج عن طوعه؟؟ ده لا يمكن، أسيبه؟ أبدا
لغاية ما فاض بيها الكيل...و السيسى زودها أوى أوى أوى
و الأنيل انّه ساب صحابه عليها كمان
ده يسب و ده يشتم و ده يهزّأ
...وعنها, أعترضت
...و أتمردت
و ثارت
لغاية ما السيسى أنكشح, و جالها سيسى تانى
و ساعتها بس, عرفت قيمة حبيبها السيسى القديم

احلى ليالى كريسماس الربيع

تعلن ادارة السلامترو كافيه عن احتفالية التوسع الافقى للقهوه
وتدعو سيادتكم لحضور الحفل المكون من

الساحر الاقليمى "عبود سلانسيه" و حيله العجيبة...و نرجو من الحضور احضار كمامات بسبب الروائح التى قد تصدر

الراقصة المُكتئبة "ميمي زلطة" مع رقصة الشمعدان والديش واشر...و نرجو من الحضور احضار كمامات بسبب الروائح التى قد تصدر

الفنان الاستعراضى "جرجير عبد الجبار تامر" على انغام الفنانة "فواكة البحر عنتر" مع باقة من اقذر الاغنيات

ومفاجأة الحفل... الفيلم الأومبله!!! الذى حاز علي 35 جائزة اوسكار ومُرشح ل16 غيرهم

"عفواً انى ديناصور"

بطولة
الحاج ناصر ميناتل سلامة
قمر الدين الكُنيفى سلامة
زيزي بلاستيك سلامة
بيسو ولاعات سلامة
روحية ستة اكتوبر سلامة
والنجمة العجوزة عنايات سلامة
والنجمة اللأجنبية شوشو فيفتي سنت

السلامترو فى انتظار الشقايق

مع كبايه اللمون

حوار لبنان مولع في العالم كله اليومين دول .... أشي ضرب في العيال و الستات اللي بتولع و المستشفيات و الكنايس و الجوامع و القهاوي و اي حاجه ملهاش دعوه بحزب الله و الحرب من أصاه

و طبعا كانت قهوه العظماء سباقه في مناقشه الحوار ... الزباين طبعا ... أحنا ملناش دعوه بالسياسه يا معلم ... و في ركن المعاشات جلس كل من صلاح سالم و هو زبون مستديم في القهوه و السيد محسن ممتاز رجل المخابارات المحنك و السيد عمرو موسي أمين عام جامعه الدول ... و أبراهيم المنجد اللي فاتح محل علي الناصيه اللي بعد الفرن... و دا سياسي بارع لولا النصيب.. -دا علي حسب كلامه طبعا..... و أنضم اليهم في الآخر السيد رفيق الحريري ... اللي كان جي متأخر شويتين لظروف الحرب هناك يا معلم

أنضم السيد الحريري للجلسه و أعصابه بايظه خالص جنب السيد أبراهيم ممتاز اللي أطلق صوته الجهوري الأجش (صوت يوسف شعبان من الآخر يعني) يا ناااااااااااصر هات لمون لعمك رفيق

شرب السيد رفيق كبايه اللمون و روق أعصابه و أفتتح السيد محسن ممتاز المناقشه بعد ما ولع سيجاره و عزم بسيجاره علي ديفيد... أصدي أبراهيم المنجدو قال بصوته -اياه-:
هما الصهاينه دول مش ناويين يجيبوها البر.... طول عمرهم عملين صيع و فاكرين أنهم أحسن ناس في الدنيا و أنهم الشعب المختار و الكلام الفارغ ده.... و أنا فاكر زمان ساعه لما كنت بجند العميل 113 رأفت الهجان كان خايف جدا من لقاء اليهود.... بس اليهود دول ولاد كلب رمم يخافوا ميختشوش .... يعني هما خايفيين مننا أكتر ما أحنا بنكرهم و مش طايقنهم و بعدين هما بني أدمين زيينا يمكن يكونوا حذيرين أكتر مننا حبيتين... بس أحنا برضه مش شويه
قاطعه عمرو موسي:
يا سيد محسن ... مع كامل أحترامي لوجهه نظرك ... بس الكلام ده كان زمان ...أحنا دلوقتي مش بنحارب يهود أحنا بنحارب أمريكان قبل اليهود .... و خد بالك أنه دلوقتي معدش فيه أتحاد سوفيتي ... يعني فرعون منغير موسي ... مع الفارق طبعا في التشبيه... و خد بالك أن العرب أنهارده مش ذي أمبارح ... أحنا أتفارقنا أكتر و أتشتتنا أكتر

دخل المنجد في الحوار:يا خوانا .... صحيح أننا متخانأين و مشاكلنا و صلت لأخر حاجه بس برضه الضفر ميطلعش من اللحم و ايه؟؟ .... و الجدع اللي أسمه نصر الله ده أنا بحبه و بموت فيه و الراجل بتاع أيران ده اللي كل حكومات العرب بتكرهه أنا بحبه و بأيده و أبايعه كمان لو لزمت ... أه وااله يعني الواحد خلاص هيكفر يا خلق دنا سمعت حتي أنهم -ولاد الكلب - بيشوفوا الحاجات اللي عليها صليب من فوق في بيروت و يضربوها... يعني بيضربوا في الكنايس و المشتشفيات.... أتفرجوا علي الأخبار في القناه الأولي حتي و صدقني هتتمني تنزل الشارع دلوقتي و تلاقي يهودي تنزل ضرب في ميتينوا لحد ما يبانلوا صاحب
ولا أنا كلامي فيه غلط يا باشمهندس

قاطعه صلاح سالم:
يا حاج أبراهيم الموضوع مش كده ... أنت لازم تفرق كويس بين الصهاينه و اليهود ...و بعدين ميين قالك أني باشمهندس ... ما علينا أنا هطلع علي مركز قياده الثوره حالا ... في خطاب للريس

و أخرج عمرو موسي حافظته و قال : و أنا كمان هروح أنام بقي ... أنا رايح بكره مؤتمر روما و لازم أنام كويس .... يصبحوا علي خير

خرج محسن ممتاز من القهوه و صاح ... يا عمرو ... حاسبلي معاك
و جاء الواد فرج صبي الحاج أبراهيم المنجد و ندهله عشان الحاجه أستعوقته ... خد ديله في سنانه و طيران عل بيت

و ظل السيد رفيق وحيدا مع كوبايه اللمون

يوم 23 يوليو ..... مقابله عاديه جدا

المره دي هحكي حكايه واقعيه شفتها و عشتها بعنيا اللي هياكلهم الدود دول أمبارح علي سلامترو
كتير منكم مش هيصدق وأكتر منهم هيشتموني و أكتر و أكتر هيبطلوا ييجوا القهوه دي تاني .... بس الحقيقه ان بعد السنين اللي قضيتها في القهوه دي .... آمنت بأن مفيش حاجه مستحيله

كنت قاعد في حالي ساعتها بتفرج علي فيلم (شروق و غروب) للمره التاسعه عشر بعد المليار الرابع .... بس والله في استمتاع و نشوه و جنبي فنجان القهوه السريقوسي من أيد (جابر) اللي مبيعرفش يعمل حاجه في البوفيه غير أنه بيغلي الببس .... و دا موضوع تاني نبقي نرغي فيه بعدين ... المهم يا معلم ألاقي مين داخل عليا و قعد في الكرسي اللي جنبي .... صلاح سالم السياسي المعروف و عضو مجلس قياده الثوره
طلب واحد شاي علي بوسطه و بدأ يشرب الشاي في أستمتاع مبالغ فيه .... ثم نظر لي من وراء نظارته السوداء القاتمه و أمرني بلهجه عسكريه .... (هات كبريت) ... و أنا طبعا ذي المسحور طلعت كبرين من جيبي و أديتهوله - و أنا جبت كبريت منين دنا مبشربش سجاير- ... أستخدم أعواد الكبريت و أشعل غليونه و قال ... ( الفيلم ده من أحسن الأفلام اللي شفتها في حياتي أنا شفت كتير قوي يابني ... و عاشرت أيام الأنجليز و الملك و الثوره و الجلاء ..... بس صدقني كل اللي أنت بتشوفه في الأفلام دي ميجيش واحد من عشره من الحقيقه الظلم يابني كان وحش عشان كده أحنا قمنا بالثوره دي .... و كتبنا بأيدينا تاريخ مصر .... أنا و ناصر و السادات و نجيب و حكيم و ... و .... و....
و هنا دخل علينا و جه جديد - تقريبا كان قاعد من فتره و الحديث عن الثوره عجبه قالك منتكلم بقي أشمعني هما يعني .... القهاوي مليااااااااااانه ناس من دول

دخل الراجل الحشري في الموضوع أكنه كان بايت معانا أمبارح ( يا جماعه أي بلد فيها ظلم أو طاغيه لازم تقوم فيها ثوره .... الناس بتتعب كتير و بتشيل في نفسها و تسكت و تكتم لكن في يوم لازم يطقوا .... و ساعتها لازم يكون هناك قائد يقود القطيع الثائر ,,, ولا ايه؟؟؟ أنا مستعد أقود الناس في أي مكان .... أنا بكره الظلم قوي .... قوي

نظرت بدهشه الي (الحشري) و الي شعره الطويل الناعم .... الي لونه الخمري ... الي شعر دقنه اللي بيفكر يطلع و بيفكرني بدقني ونا في أولي ثانوي .... ركبت الصوت المبحوح المميز لمرضي الربو ساعه الأنفعال علي الهيئه و الثقه الزايده علي السيجار الكوبي اللي صعب قوي تلاقي واحد بيشربه علي قهوه و خصوصا ذي سلامترو..... ساعتها ضربت نفسي ألف صرمه معنويه - طبعا- أنا أزاي معرفتوش أول لما شفته .... دا صورته موجوده في كل حته ... دي أوضه نومي شخصيا فيها صوره ليه و تليفوني أبو بلو تووس فيه صورتين تلاته ليه... دا طلع جيفارا .... المناضل الثوري العظيم .... التشي

رد عليه صلاح سالم ( يابني مينفعش الكلام ده .... السياسه دي علم مش طابونه .... أحنا قمنا بالثوره و حررنا مصر من الظلم ... و طبعا أحنا منقدرش ننكر دورك المهم في تحرير بعض دول أمريكا الجنوبيه .....بس مصر محتاجه ناس منها شباب من ولادها ... انت كل دورك ممكن تكون مجرد رمز ... و أن كان يعني مصر مش ناقصه رموز ....)

و هنا دخل علينا طفل شكله عبيط منخيره قد الكوز .... مش ماسك نفسه ذي الرجاله كده و النصيبه أنه أقرع كمان و أنا مبكرهش قد الطفل العبيط الأقرع

دخل يرغي في السياسه هوا كمان .... بقي من بعد صلاح سالم و جيفارا جي الفسيه ده يتكلم
المهم يعني أنه كان محتج جدا علي كلام صلاح سالم( يا عمو صلاح البلد دي ذي الفله .... و بكره لما أمريكا تدخل هنبقي كلنا مبسوطين .... أنا سمعت بابي بيقول كده لمامي من يومين و بعدين بابي بعتني أجيبله سجاير من عند الراجل البعيد)

نظر له صلاح سالم نظره حسره و راح مطلع من جيبه تعريفه و طبطب علي راس الطفل و قاله( روح يا جيمي يلا هات أرواح و نبوت الغفير) و بص نظره للسما و قال (عليه العوض يا ثوره)

بصيت علي التليفزيون لقيت الفيلم خلص - أيه الرزاله دي- طلبت الحساب و سبت التبس و سلمت علي الحاج صلاح و الخواجه التشي و أتفاقنا لينا لقاء تاني في عيد الثوره اللي جاي ان شاء الله

أقوال في مناسبات

شوف يا بني .... القعده في القهوه ذي ما ليها عيوب كتير .... أكيد لها برضه مميزات حتي لو مكانوش قد العيوب الكتير .... من المميزات المش كتير دول هوا الأحتكاك بالناس ... و خصوصا لو كنت في قهوه عظيمه ذي سلامترو

يعني تشوف ناس جديده .... تسمع كلام جديد.... تسمع و تتناقش في أخبار .... أخبار مهمه أو أخبار ملهاش أي تلاته عازه امثال أخبار هيفا و الوليد بن طلال و كليب نانسي الجديد-أنا بموت في نانسي بس لما يبقي ده هدفي في الحياه أني أشوف كليب نانسي يبقي عليه العوض

المهم يعني ان المواقف كتير .... و خصوصا -تاني- أن المقيمين في القهوه-سلامترو-من الناس الغتته اللي مبتعديش حاجه منغير ما تعلق عليها ناس فاضيه من الآخر .... أصلهم لو وراهم حاجه ولا ليهم حته تلمهم مكنوش قعدوا علي قهوه ولا أحنا أشتغلنا لموأخذه يعني

موقف الحاج عمر بعد لما سمع حوار مجلس الشعب لما كانوا بيتكلموا علي فيلم عماره يعقوبيان و سايبين البلد تضرب تقلب ....قالك ايه بقي( قولتلوا تيجي نلعب شخشخانه في البلكونه ... قالي يعني أيه بلكونه هاهاهااللععع خخخخخ)
سمع الحوار ده شاب قاعد مع أصدقائه -و غالبا هم دول رفاق السوء- راح مميل علي واحد صاحبه و قاله( علي رأي نجيب سرور -الله يرحمه- في قصيدته الخالده ال**أميات ....
و مجلس الشعب الميمون
و فلاحينه أفنديه
و الأسطي فيه لابس ببيون
و شعاره تحيا الملوخيه

أخبار اليوم

الخبر الأول:
كما هو معروف أن المعلم قد قام بطرد الواد (فحته) عشان كان بيخنسر في المعسل و بيشرب شيش الزباين .... و قد تم تعيين (كريستا) و هو قهوجي علي كيف كيفك ... و كان محترف سابقا في قهوه السلام ...معاه شهاده خبره سنتين في رص حجر المعسل و قبليها كان صبي نقاش
________________

الخبر التاني :(أبعت يابني حجر.... و هاتلي شيشه تانيه لحسن دي مش سالكه... بسرعه ياد)
واحد من الزباين قام منغير ما يحاسب ..... تقدر تقول كان نهاره ذي ليله يوميها .... هوا صحيح كان قد الفحل و شبه الراجل بتاع الفقره الزراعيه بتاعت صباح الخير يا مصر .... بس ده طبعا مكنش يشفعلوا عند المعلم( الله يخرب بيت الحجر اللي بترصه يا كريستا ....دا بيدهن الحجر بشويه معسل..... واضح أن النقاشه خسرتك).... و قام المعلم بطرحه أرضا في وضع زرع البصل الشهير .... و أتلم عليه أهل الخير عشان يساعدوا(علي الزبون مش المعلم طبعا)و أنتهت الحرب بكسر رجل الزبون من القهوه نهائيا هوا و أمثاله من (الباراشوتات) بجعله عبره لمن يعتبر و الله يرحمه

______________

الخبر التالت:
( يا كريستااااااااااااااااااا .... الله يخرب بيتك أنت واللي مشغلينك... مفكرتش يابني ترجع للنقاشه)
قررت أداره القهوه المتمثله في أعضاء مجلس الأداره (أنظر يمينك ) .... تقديم خدمه الميريمام تشارج في القهوه .... و يتم تحصيلها مع الأتاوه أو لو كانت ظروفك وحشه حبيتين(مش لاقي تاكل من الآخر يعني) أترك تعليق مناسب و ممكن نسامحك

استمورنينج

...صُباع الخير

ايه الليلة السودة دي

انا طردت امبارح الواد فُحتة بتاع لامؤاخذة الولعة.... الواد يا عيني جعان دخان

!!!كل ماينزل شيشة للزباين يخلصلهم الحجر قبل ما يشربوا...قال ايه؟ بيحمي الشيشه

ييجي اللامؤاخذة الزبون يشرب.. مايلاقيش

(هو آه كده ممكن يكون بيزود السالز (اللامؤاخذه المبيعات

بس سمعة السلامترو فوق كل شيء

!!!ولا اييييييييييييييه؟

ولا يا فُحتة...هاتلي ولعة يلاااااااااا

(!آه صحيح... دانا طردته!!! ايه الصنف الهباب ده )

بعض الأقوال اللى هتسمعها على سلامترو منّى أو من أى حد تانى

1-تفتكر فى يوم هنبقى كده؟؟؟؟
تقولها و انت بتبص على الراجل اللى مش عارف يمشى من كتر ما كبر و مع ذلك محموق أوى على اللمّة اللى راحت منّه فى الاستيمشن

2-يانهار أبيض!!!
تقولها بعد ما تسمع مكالمة واحد محترم عنده خمسة و تلاتين سنة و بيتفق هيفوت على صاحبه أمتى عشان يجيب فيلم هوبّا هوبّا عشان يسهر عليه

3-ابن ال@#$!* بيضحك
بعد ما تكتشف ان البيه اللى فى الترابيزة اللى جنبكو متابع الحوار بتاعكو و بيضحك كمان عليه

4-ليه كده يا بيه؟؟؟ أجيبلك تفاحة؟؟؟
لما تقول ل القهوجى : لا شكرا, بطلت معسّل

5-مش تكن و تهدى بقى؟؟
لمّا واحد يبدأ يمتّعكوا و يشنّف ودانكو بفاصل من الفتى...ف تتلفت للى قاعد جنبك و هارش -زيّك- اللى فيها, و تقوللو البوء ده

6-يحرق أبو نظام الكتابة فى البلوجات
لما علامة زى دى ** تطلّع عين أهلك و تخليك تنشر البوست سبع مرّات

SALAMTRO CAFE

dear sirs ....
it`s our pleasure in SALAMTRO CAFE 2 c our dear clients r comin back again ....
our cafe is open 24/7 ..... here we talk ,ask 4 some beverages ,or even eat something
well ... btw ...u like shisha???? tofa7a??,kantalob???5oo5???farawla????or even me3asel & 2as ????:D ......
we r here 2 say everything we like & dislike .... i hate smoking & can`t quit .... nt a problem i heard in SALAMTRO CAFE that (el-leb wel sodany )may give ya some help ....
in SALAMTRO cafe there r no diffderence between me & `em .... we say wut we see ONLY ... may b our comments also ....but finally SALAMTRO CAFE is da cafe u used 2 visit .... whereever u live ..sure u `ve found da cafe u like .... & if nt ... blv me SALAMTRO is da best
SALAMTRO CAFE ... is a mix of diffrent cultures ....( ELSALAM CAFE)& ( CILANTRO CAFE)
da first includes ..... students m3fneen, old ppl( fo2 elseteen ya3ni 3l ma3ash), shoes cleaner(masa7 gezam) .... samasrah(gam3 semsar) .... mo5bereen....3omal ....fe2at mo5talefa men elsha3b elkade7 ..
while in da 2nd ... u find other types of ppl .... students NODAF ela 7ad ma(welad nas), engaged guy& gurl , old ppl 2 (NODAF bardo) ....buissness men tryin 2 `ve a drink & talkin about buissness ..... Ahmed Ezz & Nour acting in MALAKY ALEX.
c da diffrence :D.....
SALAMTRO CAFE .... mixed `em all .... so ... it`s a diary from EGYPTIAN 2ahawy