Thursday, August 03, 2006

مع كبايه اللمون

حوار لبنان مولع في العالم كله اليومين دول .... أشي ضرب في العيال و الستات اللي بتولع و المستشفيات و الكنايس و الجوامع و القهاوي و اي حاجه ملهاش دعوه بحزب الله و الحرب من أصاه

و طبعا كانت قهوه العظماء سباقه في مناقشه الحوار ... الزباين طبعا ... أحنا ملناش دعوه بالسياسه يا معلم ... و في ركن المعاشات جلس كل من صلاح سالم و هو زبون مستديم في القهوه و السيد محسن ممتاز رجل المخابارات المحنك و السيد عمرو موسي أمين عام جامعه الدول ... و أبراهيم المنجد اللي فاتح محل علي الناصيه اللي بعد الفرن... و دا سياسي بارع لولا النصيب.. -دا علي حسب كلامه طبعا..... و أنضم اليهم في الآخر السيد رفيق الحريري ... اللي كان جي متأخر شويتين لظروف الحرب هناك يا معلم

أنضم السيد الحريري للجلسه و أعصابه بايظه خالص جنب السيد أبراهيم ممتاز اللي أطلق صوته الجهوري الأجش (صوت يوسف شعبان من الآخر يعني) يا ناااااااااااصر هات لمون لعمك رفيق

شرب السيد رفيق كبايه اللمون و روق أعصابه و أفتتح السيد محسن ممتاز المناقشه بعد ما ولع سيجاره و عزم بسيجاره علي ديفيد... أصدي أبراهيم المنجدو قال بصوته -اياه-:
هما الصهاينه دول مش ناويين يجيبوها البر.... طول عمرهم عملين صيع و فاكرين أنهم أحسن ناس في الدنيا و أنهم الشعب المختار و الكلام الفارغ ده.... و أنا فاكر زمان ساعه لما كنت بجند العميل 113 رأفت الهجان كان خايف جدا من لقاء اليهود.... بس اليهود دول ولاد كلب رمم يخافوا ميختشوش .... يعني هما خايفيين مننا أكتر ما أحنا بنكرهم و مش طايقنهم و بعدين هما بني أدمين زيينا يمكن يكونوا حذيرين أكتر مننا حبيتين... بس أحنا برضه مش شويه
قاطعه عمرو موسي:
يا سيد محسن ... مع كامل أحترامي لوجهه نظرك ... بس الكلام ده كان زمان ...أحنا دلوقتي مش بنحارب يهود أحنا بنحارب أمريكان قبل اليهود .... و خد بالك أنه دلوقتي معدش فيه أتحاد سوفيتي ... يعني فرعون منغير موسي ... مع الفارق طبعا في التشبيه... و خد بالك أن العرب أنهارده مش ذي أمبارح ... أحنا أتفارقنا أكتر و أتشتتنا أكتر

دخل المنجد في الحوار:يا خوانا .... صحيح أننا متخانأين و مشاكلنا و صلت لأخر حاجه بس برضه الضفر ميطلعش من اللحم و ايه؟؟ .... و الجدع اللي أسمه نصر الله ده أنا بحبه و بموت فيه و الراجل بتاع أيران ده اللي كل حكومات العرب بتكرهه أنا بحبه و بأيده و أبايعه كمان لو لزمت ... أه وااله يعني الواحد خلاص هيكفر يا خلق دنا سمعت حتي أنهم -ولاد الكلب - بيشوفوا الحاجات اللي عليها صليب من فوق في بيروت و يضربوها... يعني بيضربوا في الكنايس و المشتشفيات.... أتفرجوا علي الأخبار في القناه الأولي حتي و صدقني هتتمني تنزل الشارع دلوقتي و تلاقي يهودي تنزل ضرب في ميتينوا لحد ما يبانلوا صاحب
ولا أنا كلامي فيه غلط يا باشمهندس

قاطعه صلاح سالم:
يا حاج أبراهيم الموضوع مش كده ... أنت لازم تفرق كويس بين الصهاينه و اليهود ...و بعدين ميين قالك أني باشمهندس ... ما علينا أنا هطلع علي مركز قياده الثوره حالا ... في خطاب للريس

و أخرج عمرو موسي حافظته و قال : و أنا كمان هروح أنام بقي ... أنا رايح بكره مؤتمر روما و لازم أنام كويس .... يصبحوا علي خير

خرج محسن ممتاز من القهوه و صاح ... يا عمرو ... حاسبلي معاك
و جاء الواد فرج صبي الحاج أبراهيم المنجد و ندهله عشان الحاجه أستعوقته ... خد ديله في سنانه و طيران عل بيت

و ظل السيد رفيق وحيدا مع كوبايه اللمون

8 comments:

Maat said...

و ظل السيد رفيق وحيدا مع كوبايه اللمون

ahhh, w mafeesh kobayet lamoon kaman, khelset.

كلمه said...

3la ra2yek ..... bas meen yesma3 b2a

MechanicalCrowds said...

Though I disagree with the opinions, the style and the setting are great.

Anonymous said...

وسيبقي العدد في الليمون
ورفيق الحريري لوحده

زي ماقلتلك يا استاذ كلمة
انت تكشف عن ميول سياسية
ومهارة كتابية جديدة
وانا بحذرك
فيه مخبرين في المنطقة
:)

كلمه said...

mechanical crowds:
disgree?? wlahy da tb3an rage3 lek ya m3lm ... bas ya reet kont twada7 shwya ..ya3ni nastfeed bardo men weghet nazrak ya basha:D
en waaaaay shakereen mohaleleen 3l comment

Epitaph:
e7na malnash fel seyasa ya sa3adet elbeeh ...... e7an bene7ky elly bye7sal fel 2ahwa...lw 3ayzeen to2bodo 3la 7ad ..2e2fesho fe sala7 salem.... wla guevara :D

Polka Dotted said...

ana ba7eb eli 3amalo mo7sen momtaz awee 3la fekra
saneyan manazeltesh shisha leh lel7ariri?!!!
enta marfood!

Polka Dotted said...

kefaia seyasa ya moko... hena tahyees bass
saneyan ana 7amna3 el 7ariri w mousa w kol el nas el seyaseya mel do7'ol
w eb2a wareeny 7ate3ml eh ya 3ameel fo7ta!

lastknight said...

ياحول الله .. يعنى سابوا الحريرى هو اللى يشيل الحساب لوحده ؟